咱作親人朋友的,是呣是有表現出關心,提供實質、有效的協助;去扶持一個軟弱的心靈,成為他更新的氣力?
或者咱只是給佇苦難中尋求幫助的傷心人及軟弱的心靈說「在佇上帝凡事攏能」、「你當剛強壯膽」,卻無用實際的行動,互那些佇生命遭遇苦難而失去盼望的人,對咱所提供的關係中重新看出生命的意義,互in知影,就是生活充滿問題與苦難,猶原無放棄。
生命是那麼地珍貴,咱當盡一切力量相互幫助,常常反省:『咱是呣是咱的兄弟姐妹的厝邊?』有人講:『人生海海,親像一齣戲』,親像保羅佇哥林多前書四:9所說,『阮成做一棚戲,互世間及天使及人看。』
咱攏呣通相笑或者感覺自己比別人較賢(gâu),因為什麼時陣,佇咱的生活欲扮演什麼角色或是抵著什麼難題,咱攏呣知。咱只有盡力相疼、相扶持、相幫助!
今仔日咱聚集佇此,為故人舉行告別追思禮拜,除了盼望帶互遺族安慰以外,也作夥閣再思考生命的寶貴及意義,好好珍惜上帝互咱活佇現在的時間與日子!
最後我用『上帝超過風雨和大海』的歌詞與遺族與各位兄姊來相互勉勵:
有時阮的生命親像風,有時阮的生命親像雨,有時阮的生命親像山,有時阮的生命親像海!
春去秋來,花開花謝,風雨和艱苦總是會過去;春去秋來,花開花謝,美麗和青春全部親像雲!啊~風雨和大海,攏是生命的色彩,啊~風雨和大海,攏是上帝在主宰!
這是上帝的色彩,呣通來怨嗟,只要向前行,嘸免驚惶;這是上帝的色彩,呣通來怨嗟,上帝超過風雨和大海!(~許天賢牧師講于2013/04/13~)★